Padayon nga ginabantayan sa mga doktor ang kahimtang ni Senador Rodante Marcoleta human siya makasinati og kasakit sa dughan ug pag-usab-usab nga blood pressure.
Sumala sa Philippine National Police (PNP) Health Service, nagpabilin nga stable ang kondisyon sa senador apan dili pa siya andam nga moatubang sa pagdungog sa Sandiganbayan.
Matod ni Police Lieutenant Colonel Benaly Bayani sa PNP Internal Medicine Department, gipailalom pa si Marcoleta sa mga eksaminasyon lakip ang blood tests ug uban pang medical examination human siya makasinati og kasakit sa dughan ug liog.
Sumala sa mga doktor, nagpabilin nga taas ug dili regular ang blood pressure sa senador. Tungod niini, padayon siyang giobserbahan ilabina tungod sa iyang edad ug daan nang kondisyon nga hypertension.
Bisan pa nga stable ang iyang kahimtang karon, naghulat pa ang mga doktor sa resulta sa dugang nga laboratory tests aron matino kung maayo na ba pag-ayo ang iyang kondisyon.
Si Marcoleta adunay edad nga 72 anyos. Una nang giingon ni Interior Secretary Jonvic Remulla nga mahimong moabot og duha ka adlaw ang medical evaluation tungod sa edad sa senador.
Samtang, gikumpirma sa PNP nga gibisita ni Vice President Sara Duterte si Marcoleta sa PNP General Hospital niadtong Martes sa buntag.
Matod sa PNP, magdepende sa medical assessment ang sunod nga pagbisita, apan tugotan ang iyang pamilya ug legal counsel nga makaduol kaniya.
Kung hingpit nang maayo ang kondisyon ni Marcoleta ug ma-clear na siya sa mga doktor, ipahibalo dayon kini sa PNP ngadto sa Sandiganbayan.
