Mibarog si Senador Rodante Marcoleta nga dili siya mosukol kung mahitabo nga dakpon siya sa umaabot.
Sumala kang Marcoleta, malinawon niyang itugyan ang iyang kaugalingon ngadto sa mga otoridad kung adunay ipagawas nga warrant of arrest batok kaniya.
Kahinumdoman nga ang Office of the Ombudsman pa lamang ang nagsusi sa mga reklamo batok kang Marcoleta ug wala pa kini makasaka og aktuwal nga kaso batok sa senador.
Bisan pa niini, miingon si Marcoleta nga posible nga adunay ipagawas nga warrant of arrest batok kaniya ug mahimong dakpon siya sa mga awtoridad.
Kung mahitabo kini, dili na matod pa siya mosupak tungod kay katungdanan sa arresting officer ang pagpatuman sa maong warrant.
Dugang pa niya, nasayod usab siya sa mga balaod ug proseso sa pagdakop sa usa ka indibidwal. Nag-atubang si Marcoleta sa mga reklamo nga plunder ug indirect bribery sa Office of the Ombudsman.
Kini may kalabotan sa iyang giingong kapakyasan sa pagdeklara sa P75 milyon nga campaign donations nga iyang nadawat gikan nila kanhing Congressman Mike Defensor ug duha pa ka negosyante alang sa iyang 2025 senatorial campaign.
Ang maong reklamo wala pa gisang-at sa bisan unsang korte hangtod karon.
