GENSAN- Padayon ang pagpanghatag og ayuda sa mga residente sa General Santos City nga naapektuhan sa kusog nga linog, niadtong Hunyo 8 diin personal nga mitambong si Sen. Loren Legarda ug si Janella Ejercito Estrada, anak ni Jinggoy Estrada, sa relief distribution pasado alas-2 sa hapon.
Sumala ni Mayor Lorelie Geronimo Pacquiao, nakadawat og tabang ang mga residente sa Purok 13, Hicban, Mateo ug Carcon Village sa Barangay Lagao, nga lakip sa labing grabeng naapektuhang mga lugar.
Ang matag pamilya gihatagan og 10 ka litro nga tubig, usa ka sako nga bugas ug grocery relief packages aron makatabang sa ilang adlaw-adlaw nga panginahanglan samtang nagbangon gikan sa kadaot sa linog.
Gipasalamatan ni Mayor Pacquiao si Senadora Legarda ug ang pamilya Estrada tungod sa ilang personal nga pagbisita ug pagpakita og malasakit sa mga apektadong lumulupyo.
Matod niya, dako kaayo nga tabang ang ilang suporta ug pakighiusa sa panahon sa kalisdanan. Giawhag usab sa mayor ang padayon nga panaghiusa ug kooperasyon sa komunidad aron dali nga makabangon ang siyudad gikan sa epekto sa kalamidad.
