Misamot kakomplikado ang imbestigasyon sa giingong flood control kickback scheme sa Department of Public Works and Highways (DPWH). Matod ni kanhi DPWH Engineer Brice Hernandez, aduna usay mga senador nga giingong nalambigit sa anomaliya og gihinganlan niini si Sen. Jinggoy Estrada og Sen. Joel Villanueva.
Gibutyag ni Hernandez, nagnaog si Sen. Estrada og P355 million karong tuiga sa mga pipila ka proyekto sa Bulacan kung asa 30% ang SOP. Dugang ni Engr. Hernandez nga niadtong 2023, nagpagawas og P600 million si Sen. Villanueva karong tuiga alang sa pipila ka proyekto og 30% gihapon ang SOP niini.
Nasayran nga ang pamahayag ni Hernandez sukwahi sa testimonya ni Curlee Discaya atubangan sa Senate Blue Ribbon Committee kagahapon, Setyembre 8, 2025. Dihang gipangutana ni Senador Jinggoy Estrada kon duna bay mga senador nga nalambigit sa mga transaksyon, prangka nga mitubag si Discaya nga wala.
Human ang tubag ni Discaya, nag-joke si Committee Chairman Sen. Rodante Marcoleta kang Estrada sa pag-ingon sa pulong nga “Safe ka na,” nga morag gikasuko sa senador.
Gihangyo ni Estrada nga tangtangon sa opisyal nga record ang maong joke isip pagrespeto sa pormalidad sa hearing.
Tungod sa nagkasumpaki nga pamahayag nila ni Hernandez ug Discaya, nanawagan ang pipila ka magbabalaod sa mas lapad nga imbestigasyon aron masuta kon duna bay mga opisyal sa Senado nga nalambigit sa giingong kurapsyon sa DPWH.
