Gitugotan sa Sandiganbayan 5th Division si Senador Jinggoy Estrada nga temporaryong mogawas sa New Quezon City Jail sa Agosto 26 aron magpa-X-ray sa iyang mga tuhod sa usa ka pribadong ospital.
Base sa resolusyon sa korte, gitugotan si Estrada nga mogawas gikan alas-11 sa buntag hangtod alas-3 sa hapon human sa iyang medical appointment.
Kinahanglan usab nga ubanan ang senador sa tukmang mga security escort samtang anaa siya sa gawas sa detention facility.
Nakasaad usab sa resolusyon nga si Estrada mismo ang mogasto sa tanang bayranan sa ospital, medical fees, transportasyon ug uban pang may kalabotan nga gasto.
Una nang gikumpirma sa iyang legal counsel nga adunay osteoarthritis sa duha niyang tuhod ang senador.
Sa pagkakaron, naka detained si Estrada tungod sa mga kasong plunder ug graft nga may kalabotan sa giingong anomalya sa mga flood control projects.
