Subling miapela si Senator Christopher “Bong” Go sa iyang mga kaubanan sa Senado nga tabangan si kanhi Pangulong Rodrigo Duterte nga atoa sa ICC detention facility sa The Hague, Netherlands nga mabalik sa nasod.
Ang hangyo ni Go gihimo atol sa ikaduhang hearing sa Senate committee on foreign relations nga gipangunahan ni Senator Imee Marcos.
Sumala kang Go, ang importante karon nga makauli si Duterte sa nasod nga nagbutyag nga andam niining atubangon kung unsa man ang giakusa kaniya.
Dungan niini, nadismaya si Go sa wala pagpatim-aw sa mga gi-imbitahang resource persons sa hearing human gipugngan sa Malakanyang.
Samtang, dismayado usab si Sen. Imee sa wala pagtambong sa mga miyembro sa gabinete og pipila ka opisyal sa gobyerno nga ilang giimbitahan.
Tungod niini plano nga magpahigayon pag-usab og pagdungog. Kung ang singgit sa katawhan para kay FPRRD ang “Bring Him Home”, nanawagan usab si Senadora Imee Marcos para sa mga miyembro sa gabinete og “Bring Them Home” sa pagdungog sa Senado.
