Nanawagan si Senador Erwin Tulfo sa gobyerno nga paspason ang imbestigasyon ug paghatag og tabang sa mga pamilya sa mga namatay ug mga survivor sa sunog sa M/V June Aster, nga gikamatyan sa 77 ka tawo ug walo pa ang gikatahong missing sa Coron, Palawan niadtong Septiyembre 9.
Sumala kang Tulfo, dili angay pasagdan ang mga pamilyang nawad-an og minahal ug mga nakaluwas sa trahedya, ilabina kay adunay pipila kanila nga miduol sa iyang opisina tungod sa giingong kakulang sa tabang gikan sa operator sa ferry nga Atienza Interisland Ferries Inc.
Giingon sa senador nga nakadawat siya og mga report gikan sa mga pamilya sa mga biktima nga giingong gipapauli na lamang ug gipapahulat sa mga patayng lawas sa ilang mga minahal.
Gihulagway ni Tulfo nga makalilisang ang nahitabo ug gipunting nga dili angay nga magpahilom ug pasagdan lamang sa gobyerno ang mga pamilyang nabilin nga grabeng na-trauma tungod sa trahedya. Matud niya, ang maong kahimtang usa ka matang sa kawad-on sa hustisya.
Kalabot niini, gihangyo niya ang Philippine Coast Guard o PCG ug Maritime Industry Authority o MARINA nga paspason ang imbestigasyon aron matino ang hinungdan sa sunog ug ang posibleng mga kakulangon nga nahitabo sa wala pa ug samtang nasunog ang barko.
Lakip sa gusto nga klarohon sa senador kung adunay mga delikadong kargamento sa ferry ug kung nasunod ba ang mga gitakdang ’emergency protocols’ sa dihang midilaab ang sunog.
Gawas sa pagpanubag, gipadayag usab ni Tulfo ang dinaliang pag-atiman sa mga panginahanglan sa mga pamilya sa mga namatay ug mga survivor, lakip ang isyu sa kompensasyon.
Dugang pa ni Tulfo nga dad-on niya sa Senado ang maong isyu aron matino ang mga responsable sa trahedya, masiguro ang hustong tabang sa mga biktima ug makapahimutang og mga reporma aron mapalig-on ang kaluwasan sa mga biyahero sa mga barko.
