Nasuspinde ang semifinal match ni Filipina tennis sensation Alexandra “Alex” Eala batok kang Swiss qualifier Rebeka Masarova sa Birmingham Open tungod sa kusog nga ulan sa Centre Court sa Edgbaston Priory Club sa England.
Sa wala pa gipahunong ang duwa, nag-una si Eala sa deciding set, 5-2, ug usa na lamang ka game ang iyang gikinahanglan aron makasulod sa finals sa WTA 125 tournament diin siya maoy top seed.
Kusog ang pagsugod ni Eala sa unang set diin dali niyang napildi si Masarova, 6-2. Apan nakabawi ang Swiss player sa ikaduhang set human mabreak niya ang serve ni Eala sa ikalimang game ug napadayon ang momentum aron makadaog, 6-4, nga maoy nagpadecide sa ikatulong set.
Sa deciding set, nakuha dayon ni Eala ang unang duha ka games apan mibawi usab si Masarova aron matabla ang duwa sa 2-2.
Nabawi ni Eala ang kontrol sa duwa human siya makahold sa ikalimang game ug misaka sa 3-2. Pagbalik sa duwa human sa unang rain delay, nakabreak pa gyud siya sa serve ni Masarova aron makalamang og 4-2, diin nakahimo ang Swiss qualifier og tulo ka sunod-sunod nga errors.
Nakapadayon si Eala sa maayong momentum ug nakahold alang sa 5-2 nga abantehanan sa wala pa usab mibundak ang ulan nga maoy hinungdan sa ikaduhang pagsuspinde sa semifinal clash.
Gilauman nga ipadayon ang duwa sa higayon nga moayo na ang panahon ug mahimong luwas na usab ang kondisyon sa court.
