GENERAL SANTOS CITY – Hustisya ang singgit sa pamilya ni Bernie Carillo, 25 anyos harvester nga taga Domolok, Alabel Sarangani human kini aksidenteng napusilan sa gwardya sa plantasyon sa saging sa maong lugar.
Sa pakighinabi sa Bombo Radyo gibutyag ni Rodolfo Carillo nga usa ka barangay tanod sa lugar nga amahan sa biktima nga human nga gipahibalo sa kauban nga tanod sa nahitabo, gilayon silang niadto sa iyang asawa sa gitrabahuan sa anak og didto ilang nakit-an nga nagbuy-od na kini sa yuta ug may igo sa ulo nga bahin ug nagkadugo duol sa gate.
Samtang nakit-an usab sa crime scene ang suspek nga si Jibrel Alayden, guwardiya sa RPDH Banana Plantation.
Gibutyag sa amahan, wala na gidala pa sa ospital ang iyang anak human nga diha-diha namatay human naigo sa buka sa shotgun ang agtang. Sa iyang pamahayag nga magpasanga-t ug sila ug kaso batuk sa suspek tungod angayang manubag sa nahimo luyo nga gikaingong aksidente lamang ang pagkapusil sa biktima.
Giangkon sa amahan nga sakit alang kanila ang kamatayon sa ilang anak nga usa ka mahigalaon sa mga katrabaho og sa uban.
Samtang gibutyag ni Nerma Carillo, inahan sa biktima nga daghang trabahante sa plantasyon ang nakakita sa pagkasa sa suspek sa shotgun aron mapagawas ang mga bala.
