Nanghinaut ang grupong Partido Manggagawa nga madungog gikan kang Pangulong Ferdinand Marcos Jr. ang lima ka dagkong labor policies ug isyu sa sektor sa pagpanarbaho sa iyang ikalimang State of the Nation Address (SONA).
Matod kang Partido Manggagawa Chairman ug kanhi kongresista Rene Magtubo, gusto nila nga hatagan og pagtagad ni Pangulong Marcos ang pagsaka sa gidaghanon sa walay trabaho ug ang pagdaghan sa contractualization.
Ikaduha mao ang pagsaka sa presyo sa mga palaliton nga wala makasunod ang suhol sa mga mamumuo, ilabina kadtong nagdawat lamang og ubos nga sweldo.
Ikatulo mao ang pag-atubang sa pangulo sa dakong kal-ang tali sa minimum wage ug sa pagsaka sa cost of living allowance sa tibuok nasud.
Ikaupat mao ang wala pa masulbad nga iskandalo nga naglibot sa mga flood control ug uban pang public infrastructure projects nga dako usab og epekto sa mga kabus.
Ikalima mao ang kalisod nga giatubang sa nagkalain-laing sektor tungod sa giingong daw nakalimtan na sila sa gobyerno.
Matod sa kanhing magbabalaod, kung nahimong bantugang pahayag ang gisulti ni Pangulong Marcos nga “Mahiya Naman Kayo” atol sa iyang ikaupat nga SONA, kinahanglan usab kini madugangan karon og “Mahiya Naman Kayo sa Manggagawang Pilipino.”
Matud niya, sulod sa upat ka tuig nga paglingkod ni Pangulong Marcos, wala pa mabati sa mga mamumuo sa Pilipinas ang dakong kausaban sa ilang kahimtang ug daw nakalimtan na sa administrasyon ang sektor sa paggawa.
