GENSAN- Gipalig-on sa Barangay San Isidro sa dakbayan sa Heneral Santos ang seguridad sa mga eskwelahan human sa mikatap nga online threat nga nagpunting sa General Santos City SPED Integrated School.
Sumala kang Captain Edward Frederick Yumang sa Barangay San Isidro, sugod pa sa miaging semana, nagdeploy na ang barangay sa mga Barangay Security Force o tanod sa nagkalain-laing eskwelahan aron motabang sa pagmintinar sa kalinaw ug kaluwasan sa mga estudyante, magtutudlo ug ginikanan.
Dugang pa sa kapitan, nagtinabangay usab ang barangay ug ang General Santos City Police Office, ilabina ang Police Station 4, pinaagi sa pagbutang og mga kapulisan sa mga eskwelahan ug pagpalihok sa Barangay Intelligence Network aron makatigom og impormasyon batok sa mga tawo nga posibleng nagpaluyo sa mga hulga.
Matud ni Yumang, base sa ilang nakalap nga impormasyon, ang orihinal nga online post nga naghisgot sa SPED Integrated School giingong gikan pa sa Metro Manila ug dili sa General Santos City.
Bisan pa niini, giingon sa kapitan nga dili sila magpakampante ug padayon nilang palig-onon ang seguridad sa tanang eskwelahan aron malikayan ang bisan unsang posibleng insidente.
Nanawagan usab siya sa mga miyembro sa School Parent-Teacher Association o SPTA ug sa tanang ginikanan nga bantayan ug giya-an ang ilang mga anak, ilabina sa responsableng paggamit sa social media, aron mapugngan ang pagkaylap sa mga hulga ug sayop nga impormasyon nga mahimong makahatag og kahadlok sa komunidad
