GENERAL SANTOS CITY – Gipasalig sa General Santos City Police Office kon GSCPO nga andam na ang ilang security plan alang sa pagsaulog sa Paskuhan sa GenSan 2018.
Sa pakighinabi sa Bombo Radyo kang Police Senior Inspector Davis Dulawan, tigpamaba sa GSCPO, gawas sa pagbantay sa palibot, magbuhos sila ug deployment sa mga pulis sa mga lugar nga sentro sa kasaulugan ug mga aktibidad.
Sumala pa ni Dulawanm, nga anaa sa 700 ka mga ginsakpan ang ilang i-deploy sa mga lugar kung asa ipahigayon ang mga major activities.
Apan may mga higayon usab matud pa nga magpakunhod sila ug pwersa, aron mahimong reserba alang sa uban pang mga aktibidad, ug sa uban pang ginatutukan sa kapulisan sama sa mga kampanya batok sa iligal nga droga, paggukod sa mga wanted persons, ug checkpoints.
Kahibaluan nga naka-alert level 3 gihapon ang siyudad, hinungdan nga hugot gihapon ang mga checkpoint sa mga enty ug exit points sa siyudad.
Samtang, kalabot gihapon sa Paskuhan sa GenSan, lauman matud pa nga may mga ipatuman nga rerouting sa siyudad.
Kahibaluan nga ipahigayon ang soft opening sa Paskuhan sa GenSan sa Disyembre 7, samtang ang grand opening sa Disyembre 8, ug mulungtad ang maong event hangtod sa Disyembre 22.
Dungan niini, nanawagan si Dulawan ngadto sa katawhan nga magkooperar lamang sa ginapatuman nila nga security measures alang sa luwas ug hapsay nga kasaulugan.
