GENERAL SANTOS CITY – Hugot nga gipahimangnuan sa Securities and Exchange Commission kon SEC ang publiko nga dili mag-invest o magbutang ug kwarta sa ALMAMICO o ALAMCCO.
Kini human nagpagawas ug advisory ang komisyon batok sa naasoy’ng investment scam nga gatanyag ug 35% nga tubo matag bulan ngadto sa ilang mga miyembro.
Base sa naasoy’ng advisory, hilabihan kadako ang naasoy’ng interes alang sa pagsustiner sa ilang claims.
Gihingusgan usab sa SEC nga ang ALMAMICO kon Alabel-Maasim Small Scale Mining Cooperative ug ALAMCCO kon Alabel-Maasim Credit Corporation ang managsamang dili rehistrado isip korporasyon o bisan man isip usa ka partnership.
Hinungdan nga dili kini angayan ug wala gitugtan nga magtanyag, mag-solicit, magbaligya, o mag-apud-apod ug investment o securities ngadto sa publiko gumikan magkinahanglan ug secondary license aron makapahigayon ug susamang mga aktibidad.
Kahibaluan nga ang pagtanyag o pagbaligya ug securities o investment ngadto sa publiko nga dili rehistrado o walay pagtugot gikan sa SEC ang pagsupak sa Section 8.1 sa Securities Regulation Code (SRC).
Samtang ang mga nahimong salesman, broker, dealer, o agent sa ALMAMICO o ALAMCCO, nga gapangumbinse ug gabaligya ug investment ngadto sa publiko aron mag-invest sa maong investment scheme, ang mag-atubang ug kasong pagsupak sa Section 8 sa SRC Code ug mabilanggo sulod sa 21 ka tuig ug pabayaron ug penalty nga anaa sa lima ka milyon ka pesos.
Hinungdan nga hugot nga gipahimangnuan sa SEC ang publiko nga magmabinantayon una musulod sa mga susamang investment scam.
Kahibaluan nga una nang gipagawsan ug susamang advisory ang lain pang investment scam nga nagkunayap dinhi sa Mindanao nga mao ang KAPA Ministry Int’l Inc.
Ug gani, makaduha ka higayon nga nagpagawas ang SEC ug advisory batok sa KAPA hangtod nga nagpagagawas kadugayan ug Cease and Desist Order kon CDO nga kadugayan gideklarang permanente.
