SARANGANI- Nakaabot na sa pito ang kumpirmadong namatay human sa landslide nga miigo sa Sitio Blesong Fandaw, Barangay Poblacion, Malapatan, Sarangani Province, tungod sa walay hunong nga pag-ulan nga nagsugod pa niadtong Hulyo 9 sa gabii.
Sumala sa Malapatan Municipal Disaster Risk Reduction and Management Office o MDRRMO, pito ka tawo ang nakumpirmang namatay, samtang duha pa ang padayon nga gipangita ilawom sa natabunang mga kabalayan. Usa usab ka biktima ang nadala sa ospital tungod sa mga samad nga iyang naangkon sa maong insidente.
Matud ni MDRRMO Officer-in-Charge Bon Quiño, ang maong datos gibase sa inisyal nga incident report gikan sa mga responder nga unang mitubag sa lugar.
Gikumpirma usab ni Malapatan Mayor Salway “Jun” Sumbo Jr. nga nagpadayon ang search and rescue operation aron makit-an ang mga residente nga gituohang natanggong ilawom sa mga balay nga natabunan sa nagdahiling yuta.
Gipasabot sa mga otoridad nga ang kusog ug padayon nga pag-ulan maoy hinungdan sa pagdahili sa yuta nga nakatabon sa pipila ka kabalayan sa maong komunidad.
Samtang, miabot na sa 115 ka pamilya ang napugos sa pagbakwit ug mipasilong sa nagkadaiyang evacuation centers sa Malapatan tungod sa pagbaha nga dala sa kusog nga pag-ulan nga nalambigit sa Super Bagyong Inday.
Matud sa lokal nga kagamhanan, misaka ang lebel sa tubig sa pipila ka barangay nga nakapahulga sa kaluwasan sa mga residente ug maoy hinungdan sa pagpatuman sa daliang paglikas.
Gipangulohan ni Incident Commander ug MDRRMO Head Bonbon Quiño ang Malapatan Incident Management Team sa pagresponde, lakip ang pag-evacuate sa mga apektadong pamilya ug paghatag og unang tabang sa mga nabakwit.
Nagpadayon ang monitoring sa kahimtang sa panahon ug lebel sa tubig sa mga suba, samtang gipahimangnoan ang mga residente nga nagpuyo sa bahaon ug landslide-prone nga mga lugar nga magmatngon ug mosunod sa mga pahimangno sa lokal nga kagamhanan aron malikayan ang dugang pang kadaot ug pagkawala sa kinabuhi.(Report by Bombo Mark Cabanus)
