MAASIM, SARANGANI- Mismong ang mayor sa Maasim, Sarangani Province na ang nagpahimangno sa katawhan batok sa unsa mang matang sa scam.
Ang pormal nga deklarasyon ni Mayor Uttoh Salem Cutan dihang madunggan ang may kalabotan sa KAPA kon Kabus Padatuon nga gipamunuan ni Self Proclaimed Modern Moses og Pastor Joel Apolinario.
Gipadangat niini ilabi sa iyang mga konstityuwente nga dili gilayon mudasmag og magdali sa pagsalmot sa unsa mang organisasyon ilabina pa nga nagtanyag og dakong tubo gikan sa gibutang nga salapi.
Matud ni Mayor Cutan, mas maayong mangunsolta una sa mga barangay officials aron makapangayo og tambag sa unsa mang sudlan nga investment scheme aron makalikay nga mabiktima.
Nanawagan kini sa mga katawhan sa Maasim nga maghiusa aron batukan ang unsa mang matang sa pagpangilad tungod sa ulahi ang mga mabiktima ang maoy mahimong kaluluoy.
Samtang, nagnegatibo sa iligal nga droga ang mga empleyado sa munisipyo sa Maasim human gipahigayon ang sorpresang drug testing.
Sa pakighinabi sa Bombo Radyo, gibutyag sa mayor nga duha ka higayon nang nagpahigayon og drug testing sa tanang empleyado sa LGU Maasim apan basi sa gipagawas nga resulta bag-ohay lang, nasuta nga walay nagpositibo sa paggamitan og iligal nga droga butang nga gikalipay niini.
Sa pahayag pa ni Mayor Cutan, katambayayong ang PNP og PDEA sa pagpatuman sa war on drugs ni Pangulong Rodrigo Duterte og padayong imonitor ang mga taong nalambigit sa iligal nga droga sa Maasim
