SARANGANI- Gipasidan-an sa mga otoridad ang publiko nga likayan ang pagsulod sa mga coastal uplift areas sa Sarangani tungod sa posibleng peligro samtang nagpadayon ang siyentipikong pagtuon sa epekto sa linog sa maong mga lugar.
Matod ni Cirilo Lagnason, Protected Area Superintendent sa Sarangani Bay Protected Seascape, naapektuhan sa coastal uplift ang pipila ka lugar sama sa Batulaki ug Pangyan nga mga protektadong marine sanctuary tungod sa ilang maayong kahimtang sa coral cover.
Gipahayag niya nga tungod sa kalit nga pag-usab sa kahimtang sa baybayon, nadaot ang ubang coral reef, seagrass ug uban pang yamang-dagat lakip ang mga isda, kabibe ug shellfish.
Gipasidan-an usab ni Lagnason nga gidili ang pagpatukod og bisan unsang estruktura sa maong mga lugar tungod kay nagpabilin gihapon kini nga kabahin sa protected area bisan pa nga nausab ang porma sa baybayon.
Matod niya, basta wala mausab ang opisyal nga mapa sa Sarangani Bay Protected Seascape, sakop gihapon kini sa pagdumala ug pagpanalipod sa protected area.
Gipasabot niya nga ang bisan kinsa nga magpatukod og estruktura sa coastal uplift areas mahimong moatubang sa angay nga aksyon subay sa mga balaod nga nagdumala sa mga protektadong lugar.
