GENERAL SANTOS CITY – Padayong nakig-alayon ang pamunuan sa Sangguniang Panglungsod sa pamilya ni anhing Indigenous People’s Mandatory Representantive Benjamin Talon, alang sa mga impormasyon kalabot sa paglubong sa nasampit.
Kini human mitaliwan si Kag. Talon kaniadtong Sabado sa kaadlawon tungod sa sakit sa kasing-kasing.
Kahibaluan nga nagbangutan karon dili lamang ang mga IPs inay lakip ang mga non-IP’s hilabi na ang kauban sa konseho ni Talon, gumikan tungod sa iyang kamatayon, nawad-an matud pa ug maayo, ug mapainubsanon nga opisyal ang dakbayan nga may kasing-kasing gayud hilabi na alang sa mga lumad.
Kahinumduman nga nahimong hisgutanan usab ang maong pagkamatay ni Kag. Talon, human may mga nagkanayon nga posibleng tinunglo ang naasoy’ng posisyon, human nga sunud-sunod nga nangamatay ang milingkod, gikan kang Kag. Mario Impal nga gisundan ni Kag. Juanito Kindat, kansa pulos nakabsan tungod sa balatian.
Apan gilayong gipapas ni Vice Mayor Shirlyn Nograles ang maong ispekulasyon, ug gibutyag nga posibleng tungod lamang mga edaran ug may balatian ang mga nasampit dihang matuboy sa pagka-IPMR.
