Gikatakdang mo-inspeksyon ang Sandiganbayan sa male detention dormitory sa New Quezon City Jail sa Payatas, diin gibilanggo si kanhi Senador Ramon “Bong” Revilla Jr. ug ang iyang mga kauban nga akusado sa kaso sa ghost flood control anomaly sa Pandi, Bulacan.
Si Revilla kasamtangang nagpabilin sa prisohan sa Payatas samtang nagpadayon ang apela sa iyang kampo nga nagtinguha sa pagbalhin kaniya ngadto sa pasilidad sa kustodiya sa Philippine National Police (PNP).
Ang kanhi Senador gipailalom usab sa 7 ka adlaw nga quarantine sa pasilidad isip kabahin sa mga protocol sa panglawas alang sa mga bag-ong binilanggo. Human makompleto ang proseso, si Revilla mahimong ibutang sa detention cell housing diin gibilanggo ang pito ka mga opisyal sa Department of Public Works and Highways (DPWH) gikan sa MIMAROPA, kinsa gibilanggo usab kalabot sa giingong flood control anomaly sa Oriental Mindoro.
Kagahapong adlawa , si Revilla mitungha sa atubangan sa anti-graft court Third division alang sa iyang gikatakda nga pre-trial ug arraignment sa mga kaso sa graft ug malversation apan kini gi-postpone sa Pebrero 9.
