Gitabla sa San Antonio Spurs ang serye batok sa Minnesota Timberwolves human nila tambakan ang kontra og 38 puntos, 133-95.
Nagpakita og dominanteng opensa ang Spurs gikan sa sinugdanan hangtod sa katapusan sa dula pinaagi sa lig-on nga team effort diin tanang starters nakaposte og double-digit scores, nga gipangulohan ni Victor Wembanyama.
Sa pagtapos sa first half, hawid na sa San Antonio ang 24 puntos nga abante. Dinhi nakaposte si Wembanyama og 14 points, 9 rebounds, ug usa ka block.
Bisan og limitado na ang iyang playing time sa ikaduhang bahin sa duwa, nakarekord gihapon siya og double-double performance nga 19 points, 15 rebounds, ug 2 blocks sulod lamang sa 26 minutes nga pagduwa.
Alang sa Timberwolves, naglisod ang ilang mga players diin ang tanan nilang pangunang scorers nakaposte lamang og tig-12 points, nga mao na ang kinatas-ang individual score sa Minnesota.
Hawid sa Spurs ang labaw sa tanang kategorya lakip na sa overall field goals, 3-pointers, points in the paint, ug free throw line.
Sa depensa, napugos sa Spurs ang Wolves nga makahimo og 22 turnovers sa tibuok duwa. Nakarekord usab ang San Antonio og 29 fast break points samtang lima lamang ka puntos ang natubag sa Minnesota.
Samtang, ipahigayon sa Minnesota ang sunod nga Game 3 ug 4, samtang mobalik sa San Antonio ang Game 5.
