GENERAL SANTOS CITY – Gihingusgan ni Jong Facurib, administrador sa Bulaong terminal nga angayang mapaniguro ang kaluwasan sa tanan bisan pa sa new normal nga sitwasyon karon tungod sa covid 19.
Matud pa niini, ang pagbalik sa operasyon sa terminal og biyahe sa mga bus usa sa mga pamaagi aron mabangon ang ekonomiya apan dungan niini angayang masunod gihapon ang mga safety og health protocol gumikan sa maong makamatay nga sakit.
Nasayran nga 50% lang ang angayang pasahero sa matag bus og van nga gabiyahe. Ang matag bus o van angayang adunay alcohol og disinfectant footbath nga tamakan sa mga pasahero una musakay.
Ang tanang sakay nga pasahero lakip driver og konduktor magsul-ob og face mask.
Angayang masuta usab ang temperatura sa mga sakay sa bus og van gamit ang thermal gun..
Samtang dili pwede magbiyahe ang mga bus og van kung walay special permit gikan sa Land Transportation Franchising and Regulatory Board.(LTFRB).
Nagpasalamat si Facurib sa pagpadangat og impormasyon sa Bombo Radyo GenSan ngadto kaniya kalabutan sa pagpamasahero sa van nga walay pagtugot.
Gibutyag niini nga gilayong nag-aksyon ang ilang buhatan kung asa gipahimangnuan ang naghimo sa ingon.
