GENERAL SANTOS CITY – Gihingusgan ni Atty. Rogelio Garcia nga pwede nga kasuhan ang Russia ilabi si Russian Pres. Vladimer Putin og war crimes sa International Criminal Court (ICC) gumikan sa ilang pag-atake sa Ukraine.
Kini kung may ebedensya mahimo nga kasuhan kung asa adunay gikombikto na kaniadto ang ICC .
Kahibaluan nga unang gibutyag ni Pres. Volodymyr Zelensky nga ang pagpamomba sa Russia sa Kharkiv, sa residential area nga gikamatay sa daghang sibilyan ang makonsidera nga war crime.
Samtang gianunsyo usab ni ICC prosecutor Karim Khan nga mag-imbestiga sila sa nahitabo sa Ukraine human nga giatake sa Russia.
Nakadawat og daghang pangutana ang korte sa The Hague kung may hurisdiksyon sa kaso gumikan ang Russia o Ukraine ang wala nagpirma sa Rome Statute sa ICC.
Una niini giila sa Ukraine ang kapasidad sa ICC nga imbestigahan ang mga krimen human nga giatake sa Russia ang Crimea.
Kahibaluan nga ilawom sa Geneva Convention, nagpirma ang Russia nga dili targeton ang mga sibilyan sa kagubot nga makonsidera nga war crime kung himoon ang pagpangatake.
