Misulod sa bag-ong papel si Rochelle Pangilinan isip co-producer sa pinakabag-ong single sa SexBomb Girls nga “Mama Mama.”
Human sa dul-an duha ka dekada sukad sa ilang dagkong mga ‘music release’, mibalik si Rochelle dili lang isip performer kondili apil usab sa creative team nga nagtrabaho sa bag-ong kanta.
Gitapok usab sa music video sa “Mama Mama” ang SexBomb Girls ug pipila ka mga bag-ong P-pop artists, nga nagkonekta sa ilang henerasyon ngadto sa kasamtangang Filipino pop scene.
Milapas na sa duha ka milyon ang views sa music video, timailhan sa padayong interes sa fans sa ilang comeback.
Una nang nag-reunion concert ang grupo sa Araneta Coliseum niadtong Disyembre, apan tungod sa kusog nga demand sa tickets, nadugangan pa ang ilang mga show ug misunod usab ang world tour sa Australia ug Estados Unidos.
Nailhan ang SexBomb Girls sa ilang mga dance hit sama sa “The Spaghetti Song” ug “Halukay Ube,” samtang gipahibalo usab ni Rochelle nga adunay mga bag-ong proyekto ang grupo lakip ang bag-ong musika ug documentary series.
