Gipatin-aw ni Senador Robin Padilla niadtong Huwebes ang iyang kontrobersyal nga pamahayag nga siya usa ka “komunista,” human sa mga pagsaway sa publiko human sa impeachment trial ni Vice President Sara Duterte.
Sa iyang Facebook post, si Padilla miingon nga ang iyang pagka-komunista wala’y koneksyon sa armadong komunismo.
Sumala sa senador, wala na siya mituo niining matang sa komunismo tungod kay, matod niya, daghan na kini og nabiktima sulod sa kapin sa lima ka dekada.
Hinuon, iyang giingon nga iyang gipasabot ang gitawag nga Kristiyanong komunismo ug ang sistemang Mu’akhat sa Islam—karaang sistema sa pagpaambit ug kooperasyon tali sa unang mga Kristiyano ug Muslim.
“Ang sinasabi ko na komunismo ay hindi ang komunismo na dati kong pinaniwalaan. Ang komunismo na aking sinabi ay ang lolo ng komunismo ni Karl Marx. ‘Yan po ay ang mga unang Kristiyano at unang mga Muslim na nagsagawa nito sa Madinah,” matod ni Padilla.
Gihimo sa senador ang pamahayag human ang aktres nga si Angel Locsin mi-react kon nganong wala siya mosulti sa dihang gi-red-tag siya isip usa ka komunista bisan pa, matod niya, nahibal-an ni Padilla nga dili kini tinuod.
Nahinumdom usab ang aktres sa mga istorya nga giingong gisulti ni Padilla kaniya bahin sa panahon nga miapil siya sa armadong kalihukan.
“Nung mga panahong magkasama tayo, madalas mong ikuwento ‘yung panahon na namundok ka at nag-armas para ipaglaban ang bayan. Sabi mo pa nga, dinadalaw ka ng ex mo sa bundok,” post ni Angel.
