Nanawagan si Senador Benigno “Bam” Aquino nga tukion og maayo ang paggasto sa Department of Public Works and Highways (DPWH) nga P360 bilyon sa flood control karong tuiga, taliwala sa nagpadayong mga problema sa pagbaha sa daghang bahin sa nasod.
Sa gipasang-at nga resolusyon, giawhag ni Aquino ang mga komite sa Senado sa paghimo og imbestigasyon aron masuta kon epektibo ba ang mga proyekto sa DPWH ug ang pondo paingon sa hustong mga dapit.
Matod sa magbabalaod, gikan sa 2009 hangtod 2024, niabot na sa P1.47 trilyon ang kinatibuk-ang budget control sa baha, apan daghang komunidad ang nagpabiling vulnerable sa pagbaha.
Gawas sa resolusyon, nitumaw usab ang mga taho sa giingong peke nga flood control projects nga mipabor sa mga piniling kontraktor.
Ang bulag nga imbestigasyon sa Senate Blue Ribbon Committee nag-ila sa dul-an sa P100 bilyon nga kantidad sa mga proyekto nga posibleng adunay mga anomaliya, lakip na ang mga proyekto nga wala mahuman, wala kinahanglana, o gibalik-balik sa samang lugar.
Gitumbok ni Aquino ang kamahinungdanon sa transparency ug accountability sa paggasto sa pondo, ilabi na kay ang epekto sa baha direkta nga gibati sa mga lungsoranon gikan sa pagkadaot sa kabtangan ngadto sa peligro sa kinabuhi.
Gilauman nga hisgutan sa Senado ang resolusyon sa sunod nga sesyon niini, tungod kay nagpadayon ang pag-ulan ug pagbaha sa daghang mga rehiyon sa nasud.
