GENERAL SANTOS CITY – Balhug sa selda ang usa ka retiradong huwes human nga nagharass sa usa ka bangko kilid sa Makar Police Station sa Brgy Labangal ning syudad og nanghulga sa mga kapulisan nga nagrespondi sa insidente.
Giila ang nasampit nga si Ret. Judge Enrico Romualdo-Roxas, 62, taga Blk. 7, Lot 8, Doña Soledad Labangal.
Matud ni Deputy commander Sr/Insp. Robert Fores, nangayo og pakitabang ang nagpangalan og Sammy Bagyon, gwardya sa Metro bank tungod adunay hubog nga edaran nga nangharass.
Human nga nag-withdraw og salapi, giuyog sa retiradong huwes ang ATM machine. Dihang buot matud pa nga mangihi sa ATM, gisita sa guwardya.
Namugos matud pa nga musulod sa bangko apan gipugngan sa guwardiya tungod sirado sila kagahapon gumikan Dominggo.
Gitulak matud pa ni Roxas ug kusog ang main door hinungdan nga naibot ang gunitatan.
Gidala sa presinto si Roxas kung asa isog kaayo dihang gisulod na sa selda.
Mismo sa iyang atubangan, gihulga ang uban pang mga pulis sa estasyon nga pamatyon gawas nga namalikas.
Matud ni Fores, kon dili magreklamo ang bangko, ilang pagawason sa bilangguan si Roxas.
Apan, dili gihapon kini luwas tungod pasakaan gihapon nila kasong direct assault ug grave threat human ang gibuhat sa mga pulis.
