GENERAL SANTOS CITY – Gikatakdang ipresenta karong adlawa ni Vice Mayor Shirlyn Bañas-Nograles sa sesyon sa Sangguniang Panglungsod ang resulta sa unom ka bulan nga cultural mapping sa mga enumerators alang sa City Museum.
Matud kang Nograles, 26 ka volume sa libro ang nahimo, kung asa sa maong mga impormasyon masayran kung unsa ang mahimong unod sa museum.
Gikabutyag nga samtang padayon ang konstruksyon, ginaplano na usab ang mga ibutang sa sulod sa museum.
Samtang sa isyu sa area sa city museum nga matud pa gamay ug gikwestyon sa ubang mga city councilors, gihingusgan sa bise mayor nga naplastar na ang tanan, ug kon tan-awon ang lokasyon, anaa matud pa sa tunga-tunga sa siyudad ug historical, gawas pa may ordinansa na nga napanday kaniadto pang 2011 kalabot niini.
Kahinumduman nga natigayong sesyon sa nakalabay’ng semana gikwestyon sa pipila ka konsehal sama nilang Kag. Rosalita Nunez ug Franklin Gacal nganong sa karaan nga city hall building ipatukod ang city museum nga gamay ang espasyo.
