Gitan-aw karon ang direksyon sa bag-ong liderato sa Kamara human makadaug si Faustino “Bojie” De Guzman Dy III sa speakership race pinaagi sa 253 ka boto.
Sumala ni Atty. Rogelio Garcia, importante nga obserbahan kun unsay dalang kausaban ni Dy, ilabi na sa dugay nang political influence sa ilang pamilya sa probinsya sa Isabela.
Sa iyang pagtimbang-timbang, giingon ni Atty. Garcia nga kung adunay mga isyu o kalapasan sa nangagi nga administrasyon, dili kini angay tabunan o siradhan, kondili padayong tan-awon aron mahibal-an ang kamatuoran ug mahibal-an kinsa ang responsable.
Nagpahayag usab siya og kabalaka nga kung ang bag-ong liderato magpabilin lang nga impluwensyado sa daang alyansa niini, mahimo nga wala gihapoy tinuod nga kausaban, ug mahimong “same dog in a different collar” ang pagtan-aw sa publiko.
Bisan pa man, gilauman ni Garcia nga ang liderato ni Dy magdala og tinuod nga reporma sa Kamara, ug magpakita og integridad sa pagpanguna isip administrador sa House of Representatives.
