Nanawagan si Navotas Representative Toby Tiangco sa administrasyong Marcos nga aksyunan ang sunod-sunod nga dagkong pagsaka sa presyo sa mga produktong petrolyo.
Panawagan sa batakang magbabalaod nga panahon na aron suspindihon o pakunhuran ang excise tax sa mga produktong petrolyo aron mabawasan ang epekto sa padayon nga pagsaka sa presyo sa lana.
Girekomenda ni Tiangco ang paggamit sa gahum sa gobyerno ubos sa Republic Act No. 12316 aron temporaryong suspindihon o pakunhuran ang excise tax sa petrolyo.
Matod ni Tiangco, dili lamang mga motorista ang maapektuhan niini tungod kay posibleng mosaka usab ang gasto sa pamasahe, pagkaon, delivery ug uban pang pangunang panginahanglanon.
Matod pa niya, panahon na aron mangilabot ang gobyerno ug tabangan ang publiko sa epekto sa taas nga presyo sa mga produktong petrolyo.
Kung balikan, sunod-sunod sulod sa mga semana ang pagpatuman sa petroleum companies og price hike, diin sulod lamang sa tulo ka semana, misaka na og P18.31 kada litro ang diesel, P15.25 ang gasolina ug P16.67 ang kerosene.
