Gisaway ni Davao City 1st District Representative Paolo “Pulong” Duterte ang ika-5 nga State of the Nation Address ni Pangulong Ferdinand Marcos Jr. Matud ni Duterte, kulang matod pa ang tubag sa Pangulo kabahin sa mga isyu sa korapsyon ug sa kalisod nga giatubang sa daghang Pilipino.
Kini may kalabotan sa pahayag ni Pangulong Marcos nga hapit nang mapasakaan og kaso ang kanhi House Speaker Martin Romualdez may kalabotan sa giingong iregularidad sa mga flood control projects.
Apan para kang Rep. Duterte, dili igo ang maong mga pahayag sa Pangulo.
Matud niya, gusto sa katawhan nga mahibal-an ang tibuok kamatuoran ug mapanubag ang tanang nalambigit sa giingong korapsyon, lakip na ang mga isyu sa flood control funds, PhilHealth funds, ug Maharlika Fund.
Gipunting usab sa kongresista nga mas importante nga atubangon ang mga problema sa katawhan sama sa taas nga presyo sa mga palaliton, mahal nga kuryente, ubos nga kita, ug nagkadugang nga kakabos.
Dugang pa niya, ang tinuod nga kahimtang sa nasud dili masukod pinaagi sa mga palakpak sulod sa Kongreso, kondili pinaagi sa sulod sa lamesa sa matag pamilyang Pilipino, kalidad sa serbisyo sa gobyerno, ug pagsalig sa katawhan sa administrasyon.
