Pabor si Batangas 2nd District Rep. Gerville Luistro nga abrihan sa media ug publiko ang pre-trial conference sa impeachment case ni Vice President Sara Duterte.
Kahinumdoman nga wala tugoti ang media sa unang pre-trial sa kaso ni VP Sara ug pipila lamang ka bahin sa sesyon ang gitugotan nga ma-cover, sama sa roll call sa mga abogado nga mitambong.
Apan sumala ni Luistro, kinahanglan usab sabton sa publiko ang rason sa impeachment court kung nganong gipili niini nga dili ablihan sa publiko ang tanang panghitabo sulod sa maong proseso.
Matud niya, detalyado, balik-balik ug daghang trabaho ang pre-trial conference, ilabina sa pagmarka ug paghan-ay sa mga ebidensya, mao nga posible nga mao kini ang gikabalak-an sa impeachment court.
Sa ulahi, ipagawas matod pa ang mga nahisgutan ug hisgutan pa sa mosunod nga mga conference pinaagi sa usa ka pre-trial order o report kung mahuman na ang serye sa mga paghisgot.
Sa sunod semana, gikatakdang ipadayon pag-usab ang laing conference diin mag-atubang na usab ang prosecution ug defense panel sa Senado.
