Gisentensiyahan nga mapriso sa korte sa Tagum, Davao del Norte si ACT Teachers party-list Rep. France Castro ug kanhi Bayan Muna party-list Rep. Satur Ocampo.
Gisentensiyahan sila nga hangtod sa unom ka tuig nga pagkabilanggo tungod sa giingon nga nagpameligro sa mga menor de edad kaniadtong Nobyembre 2018.
Sa 25 ka panid nga desisyon, gihukman sa Tagum Regional Trial Court Branch 2 si Castro, Ocampo, ug 11 ka uban pa nga sad-an sa paglapas sa Section 10(a) sa Republic Act 7610 o ang Special Protection of Children Against Abuse, Exploitation, and Discrimination Act ug sila gisentensiyahan og pagkapriso gikan sa upat ka tuig ngadto sa unom ka tuig.
Gimando sa korte kanila sa pagbayad og P10,000 isip civil indemnity ug P10,000 isip moral damages sa matag menor de edad, nga adunay interes nga 6% matag tuig gikan sa pagtapos sa desisyon hangtod sa hingpit nga pagbayad.
Samtang, giabsuwelto sa Korte si Pastor Edgar Ugal, Rev. Ryan Magpayo, Eller Ordeniza, ug Rev. Jurie Jaime tungod sa kapakyas sa prosekusyon sa pagmatuod sa ilang sala.
Dayon usab nga gialmahan sa kampo ni Castro ang nahimong desisyon sa korte.
