Nanawagan si Lanao del Sur Rep. Zia Alonto Adiong og paspas, lawom ug komprehensibong imbestigasyon sa pag-atake sa convoy ni Bangsamoro Autonomous Region in Muslim Mindanao o BARMM interim Chief Minister Abdulraof “Sammy Gambar” Macacua sa Maguindanao del Norte.
Giinsistir ni Adiong nga kinahanglan dayong mailhan, madakpan ug mapapanubag ang mga responsable sa maong pag-atake.
Dungag pa sa kongresista nga dili lamang ang seguridad sa BARMM ang nalambigit sa maong insidente, kondili apil usab ang peace process sa Bangsamoro, ilabina nga nahitabo kini usa ka bulan sa wala pa ang unang parliamentary elections sa rehiyon nga gikatakdang ipahigayon sa Septyembre 14.
Nanawagan si Adiong sa tanang partido nga sulbaron ang mga panagbangi pinaagi sa dayalogo, demokratikong mga institusyon ug rule of law, ug dili pinaagi sa kapintasan.
Matod niya, dili angay tugotan nga ang maong pag-atake makapugong sa tinguha sa mga Bangsamoro alang sa malungtarong kalinaw ug tinuod nga self-governance.
Nahitabo ang insidente pasado alas-4:45 sa hapon niadtong Sabado, Agosto 15, sa Barangay Dulangan, Datu Odin Sinsuat, diin gipusil ang convoy ni Macacua ug sa iyang mga kauban.
Nakalahutay sa maong insidente si Macacua ug ang iyang mga kauban.
