Gihulagway ni Sen. Loren Legarda nga “unconstitutional” o supak sa Konstitusyon ug walay bisa ang nahitabong pagbalasahan sa liderato sa senado niadtong Miyerkules, Hunyo 3, 2026.
Sa iyang opisyal nga video statement, giingon sa senadora nga supak sa balaod ang pagluklok kang Sen. Sherwin Gatchalian isip Senate President Pro Tempore ug Acting Senate President tungod kay wala makab-ot sa bag-ong mayoryang grupo ang gikinahanglang ihap sa boto.
Sumala ni Legarda, ubos sa Article VI Section 16 sa 1987 Constitution ug sa Rules of the Senate, kinahanglan adunay mayoryang boto gikan sa 24 ka senador o labing menos 13 ka boto aron legal nga makapili og opisyal.
Apan matod niya, 12 lamang ka senador ang mibotar atol sa sesyon busa wala kini legal nga gahum sa pag-apruba sa reorganisasyon sa Senado ug sa pagtudlo og mga bag-ong committee chairpersons.
Gipasabot usab ni Legarda nga dili na mahimong basehan ang kaso nga Avelino v. Cuenco tungod kay kini nakabase pa sa 1935 Constitution samtang ang kasamtangang nagmando mao na ang 1987 Constitution.
Tungod niini, giingon sa senadora nga siya sa gihapon ang lehitimong Senate President Pro Tempore hangtod walay legal nga basihan sama sa pagpalagpot o diskwalipikasyon.
