GENERAL SANTOS CITY –Nagpagawas ang lokal nga panggamhanan sa Heneral Santos ug Executive Order No. 55 Series of 2021 may kalabutan sa renewal sa business permit sa dakbayan ning tuiga.
Pinasubay sa maong kamanduan, walay surcharges and penalty nga ipahamtang sa mga magrenew og business permit hangtod sa Enero 31, 2021.
Ang nasampit nga kamanduan gipirmahan ni Mayor Ronnel Rivera ug nahimong epektibo sugod pa kaniadtong Enero 20, 2021.
Tumong sa maong lakang aron nga mahatagan ug igong panahon ang mga negosytante nga makaproseso sa ilahang mga permits gumikan dili gyud malikayan nga mutaas ang panahon gumikan sa mga limitadong paglihok sa mga buhatan ug sa mga kliyente mismo.
Lakip usab sa nakapalangan atol sa pagproseso og permit ang sa mga gipatuman nga mga safety protocols sa Business Permits and Licensing Division ning dakbayan alang sa mga musulod sa ilahang buhatan luyo sa padayong bahad sa Coronavirus disease 2019.
Lakip usab sa mga tumong sa maong direktiba aron mahatagan ug igong panahon ang mga negosyante nga makapangita ug pambayad sa ilahang mga buhis hilabina sa mga negosyo nga labing naapektuhan sa paghinay sa ekonomiya gumikan sa pandemya.
