Gibayaran ni Department of the Interior and Local Government o DILG Secretary Jonvic Remulla ang kantidad nga P28,011 nga gigasto ni Reina Mercedes, Isabela Vice Mayor Atty. Harold Respicio alang sa iyang drug test.
Nagsugod ang isyu human nag-viral sa social media ang pamatasan ni Respicio atol sa usa ka forum sa ilang lalawigan. Tungod niini, gihagit ni Remulla ang bise mayor nga magpa-drug test.
Miadto dayon si Respicio sa drug testing niadtong Oktubre 7, 2026. Base sa resulta nga iyang gipublikar, negative siya sa paggamit og ilegal nga droga. Mikantidad og P28,011 ang iyang drug test.
Human ipagawas ang resulta, miingon si Respicio nga gusto niyang ipa-bayaran kang Remulla ang iyang nagasto. Gitubag dayon kini sa kalihim ug gipadala ang tibuok kantidad niadtong Huwebes, Oktubre 8.
Gipaambit ni Remulla sa comment section sa post ni Respicio ang screenshot sa iyang gipadalang P28,011 isip pamatuod nga nabayran na niya ang gasto. Kauban niini ang mubo niyang mensahe nga, “Eto na, Happy?”
