Gibantayan sa Philippine National Police (PNP) ang giingong remnants sa unang nabungkag nga private armed group (PAG) sa Negros Oriental.
Ang maong grupo, matod sa PNP, posibleng mobalik sa Mayo 2025 midterm elections.
Nagtuo ang kapolisan nga moabot ngadto sa unom ka sakop sa maong grupo ang miikyas ug mitago sa managlahing dapit sa probinsiya human nabungkag ang ilang grupo.
Giimbestigahan sila sa posibleng kalambigitan nila sa pagpusil kang kanhi Negros Oriental Governor Roel Degamo ug siyam pa.
Giingong nalambigit usab sila sa nagkalain-laing sunod-sunod nga pagpamusil sa nahisgutang probinsiya, apil na niini ang pipila ka mga election-related shooting incidents.
Kauban sa PNP ang National Bureau of Investigation (NBI) nga nagbantay sa ilang posibleng pagbalik.
Bisan pa niini, gi-report sa lokal nga pulisya nga wala’y monitoring report bahin sa mga gun-for-hire nga mga indibidwal nga mahimong magsuroysuroy sa NegOr sa kataas sa 2025 midterm elections.
