Maghiusa ang mga lider sa Simbahang Katolika, ubang religious groups ug civil society organizations alang sa bag-ong dakong protesta nga gitawag og “White Ribbon Movement March” sa Hunyo 28.
Ang maong kalihokan mosunod sa nangaging mga protesta nga nanawagan og accountability tungod sa mga isyu sa korapsyon sa nasud.
Sumala ni Bishop Colin Bagaforo sa Kidapawan ug convenor sa CBCP Inter-Religious Leaders’ Council for National Transformation, ang martsa usa ka faith-based nga lihok nga nakabase sa pag-ampo, pagpamalandong ug panaghiusa alang sa kausaban.
Pagahimoon ang kalihokan sa People Power Monument diin ilang ipanawagan ang tinuod nga serbisyo publiko, hustisya, ug pagpangayo og kaakohan sa mga nalambigit sa korapsyon.
Gipasiugda usab sa grupo ang pagpasa sa usa ka epektibong balaod batok sa political dynasty ug giimbitar ang mga organisasyon, mag-uuma, mangingisda ug mga mamumuo nga moapil sa maong panawagan.
