Gisuportahan sa Regional Development Council Region 12 ang paghimo sa Early Recovery Plan aron maandam ang rehiyon sa posibleng epekto sa magnitude 7.8 nga linog sa kadagatan sa Sarangani.
Ang maong suporta gipalig-on atol sa ika-93 nga regular nga meeting sa konseho kaniadtong Hunyo 24 sa Tacurong City.
Atol sa meeting, gipresenta ang lima ka prayoridad nga lakang alang sa sayong bahin sa rehabilitasyon, lakip ang paghimo sa Early Recovery Plan, pag-organisa sa mga Post-Disaster Needs Assessment teams, pagdali sa pag-andam sa Rehabilitation and Recovery Plan, pagpangita og luwas ug siyentipikong mga solusyon sa mga problema sama sa coastal uplift, ug pag-ila sa luwas nga relocation sites alang sa mga mapalikas nga residente.
Tumong sa maong plano nga magsilbing giya sa mga ahensya sa gobyerno ug uban pang mga sektor sa pagbalik sa mga nag-unang serbisyo, pag-ayo sa mga naguba nga imprastraktura, pagbangon sa lokal nga ekonomiya, ug pagtabang sa mga komunidad nga maapektuhan sa kalamidad.
