SARANGANI PROVINCE – Balhog karun sa selda ang Top 1 Most Wanted Person sa kasong pagpanglugos human kini masikop sa kapulisan sa Purok Sentro 1, Barangay Datal Batong, Malungon, Sarangani Province.
Giila ni PLtCol. Jovenson Bayona, hepe sa Malungon Municipal Police Station ang suspek nga si alyas Rolando, 68 anyos ug residente sa nahisgutang lugar.
Matod sa nahisgutang opisyal, mga ala-una sa hapon dihang nasikop sa kapolisan ang suspek ubos sa warrant of arrest sa kasong kriminal nga adunay numero 03229-23 tungod sa pagpanglugos ug walay piyansa ang girekomenda sa korte kalabot niini.
Dugang pa ni Bayona nga unang niabot sa ilang buhatan niadtong miaging tuig ang mga biktima nga gikaingong mga anak mismo sa suspek.
Apan matud pa niya nga dugay na nga gipahimuslan ni alyas Rolando ang iyang mga anak, butang nga wala gilimod sa suspek.
Nagpasalamat usab ang Malungon PNP sa mga sibilyan nga mitabang ug mihatag og impormasyon alang sa malampusong pagkasikop sa suspek.
