GENERAL SANTOS CITY – Gikatakda nang mubiyahe sa Kauluhan sa Agosto 23 ang pambato sa GenSan nga si Rachelle Valerie Faeldin alang sa Mutya ng Pilipinas 2018 nga matigayon na sa September 17.
Kahinumduman nga miaging semana, mibalik si Faeldin sa Sangguniang Panglungsod muhangyo ug suporta, human nga gihingusgan nga mahinayon na gayud ang iyang pag-apil sa nasampit nga pageant.
Kini human nga kahinumduman nga nailad siya kaniadto sa nagpailang organizer nga taga-dakbayan nga maoy rason nganong wala nakaapil sa Mutya ng Pilipins 2017.
Ug gani, naulawan matud pa siya human nga napresenta na ang kaugalingon sa GenSan City Council apan napurnada ang pag-apil sa maong pageant.
Apan ning higayuna mahinayon na gayud, ug nagpasalamat matud pa si Faeldin sa lokal nga panggamhanan sa GenSan sa padayong pagsuporta sa iyang pangandoy nga maangkon ang korona sa Mutya ng Pilipinas.
