Gipaubos na sa booking procedure ang upat ka miembro sa Kingdom of Jesus Christ Church o KOJC nga wanted sa kaso nga gikalambigitan sa prime suspect nga si Pastor Apollo Quiboloy.
Gikompirma sa Philippine National Police ang pagdakop sa mga co-accused sa kaso nga sila Jackielyn Roy, Ingrid Canada, Cresente Canada ug Sylvia Cemañes.
Gibutyag ni PNP spokesperson Police Colonel Jean Fajardo nga lakip sa misurender ang pugante nga pastor human mihatag sila og 24 oras nga ultimatum nga sudlon ang usa ka gambalay nga dugay nang gibantayan sa mga miyembro sa simbahan.
Nagsugod ang negosasyon pasado ala-una sa hapon ug nadesisyonan sa legal counsel sa simbahan nga ihatag ang mga wanted person bandang alas 6 sa gabie.
Human nahuptan sa kapolisan ang respondents, gikompirma ni Fajardo nga silang tanan gipasakay sa C-130 plane gikan sa Davao City padulong sa Kauluhan.
Gitin-aw sa tigpamaba nga “joint efforts” sa PNP ug Armed Forces of the Philippines ang pagpatahan kang Quiboloy.
Ilawom sa booking procedure ang pagkuha sa finger prints ug mugshots sa mga akusado.
Una niini, mismo si Department of Interior and Local Government Secretary Benhur Abalos ang mipagawas sa balita nga pasado alas 6 kagabii nadakpan si Quiboloy nga miresulta sa pag-trending sa pangalan ni Quiboloy sa managlahing social media platforms sa Pilipinas.
