GENSAN – Padayon ang kalamboan sa Queen Tuna Park, usa sa mga kilalang destinasyon sa Dakbayan sa Heneral Santos.
Sumala ni Allan Marcilla, hepe sa CENRO-GenSan, nahuman na ang pagtaud og tiles ug pag-instalar sa arko sa entrada, ug andam na kini alang sa sunod nga hugna sa konstruksyon.
Gipadayag ni Marcilla nga pinaagi sa paningkamot ni Mayor Lorelie Pacquiao, nakuha ang pondo gikan sa city fund ug external sources, nga maoy nakatabang sa pagpadayon sa proyekto. Aduna pa kini’y ikatulong hugna (Phase 3), apan hangtod karon, wala pa’y klarong budget alang niini.
Base sa pamahayag sa contractor, kapin P60 hangtod P80 milyon pa ang gikinahanglan aron makompleto ang tibuok proyekto.
Naghinaot si Marcilla nga madugangan ang pondo aron mahuman ang parke sulod sa duha ka tuig, ug mahimong usa kini sa pinakamaanyag nga pampublikong lugar sa rehiyon.
Lakip sa gi-forecast nga features sa parke mao ang modernong fountain, baywalk, children’s playground, ug activity area nga angay sa tanang edad.
Ang proyekto nagtinguha nga mapaambit ang mas limpyo, mas luwas, ug mas presentableng lugar alang sa katawhan sa GenSan ug mga bisita niini.
