GENSAN- Nagpahinumdom si Mac Pangonotan, presidente sa Pyrotechnic Association, sa mga mamalitay og pabuto nga importante ang pagbasa ug pagsunod sa mga label ug instruksyon sa mga produkto nga ilang paliton aron malikayan ang mga aksidente karong Pasko ug sa umaabot nga Bag-ong Tuig.
Sumala ni Pangonotan, adunay mga insidente diin ang mga kustomer mibalik ug mireklamo human mibuto ang pabuto nga ilang gipalit, apan sa ulahi ilang nadiskobrehan nga wala nila tangtanga ang taklob o wala nila gisunod ang saktong instruksyon sa paggamit.
Gipasiugda niya nga ang mga produkto sa pyrotechnic gimarkahan ug adunay klaro nga instruksyon aron masiguro ang kaluwasan sa mogamit ug husto ang resulta sa fireworks display.
Giawhag usab niya ang publiko nga mopalit lamang gikan sa mga legal ug lisensyado nga mga tigbaligya og pabuto aron masiguro ang kalidad ug kaluwasan sa mga produkto, ug manubag kung adunay aksidente, sukwahi sa pagpalit gikan sa mga ilegal nga tigbaligya kansang gigikanan ug ang kaluwasan sa ilang mga baligya dili sigurado.
