Daling nakakuha og atensiyon sa social media ang usa ka video nga nagpakita sa usa ka talagsaong puti o albino nga unggoy nga namuyo sa lasang sa Kilangil, Sitio Tudog, Barangay Bugso, Senator Aquino, Sultan Kudarat.
Ang maong video gi-post niadtong miaging adlaw ug dali nga mikaylap sa internet.
Sumala kang Belshazaao Hibaler, executive assistant ug promotion and marketing staff sa Municipal Tourism Office sa maong lungsod, ang video gikuhanan sa usa ka tour guide gikan sa IP community nga si John Danda atol sa iyang paglibot sa maong lugar.
Giingon ni Hibaler nga gipasa kaniya ang video isip pamatuod nga tinuod ang pagpakita sa albino nga Philippine long-tailed macaque sa maong lasang.
Matud pa, kasagarang masigpatan ang unggoy matag alas 6:00 sa buntag.
Madungog usab sa video nga gihagit ni Danda ang puti nga unggoy aron moatubang, samtang nagtungtong kini sa usa ka kahoy.
Dugang pa niya, duol lamang kini sa balay sa iyang igsoon ug halos matag buntag makita ang maong unggoy. Wala usab kini mahadlok sa tawo ug makaduol pa gani sulod sa duha ka lakang.
Gipanawagan ni Danda ang mga nagduda sa pagkatinuod sa video nga personal nga mobisita sa maong lugar aron makita mismo ang talagsaong unggoy.
Sa pagkakaron, gilantaw na sa mga otoridad ug sa lokal nga panggamhanan ang mga lakang aron mapanalipdan ang maong talagsaong mananap.
