Gihagit ni Davao City 1st District Representative Paolo “Pulong” Duterte si National Bureau of Investigation o NBI Director Melvin Matibag nga ipagawas ang mga ebidensiya kung adunay nakitang iregularidad sa mga flood control project sa iyang distrito.
Sa pahayag ni Duterte sa iyang social media post, iyang giingon nga anaa sa Department of Public Works and Highways o DPWH ang mga dokumento may kalabotan sa mga proyekto, lakip ang procurement records, kontrata ug uban pang detalye sa ilang pagpatuman.
Giinsistir sa kongresista nga kung adunay nakitang posibleng paglapas, kinahanglan kini suportahan og konkretong ebidensiya ug dili lamang ipahibalo sa publiko samtang nagpadayon pa ang imbestigasyon.
Matud ni Duterte, “Kung may ebidensiya kayo ng krimen, ilabas ninyo at panagutin ang dapat managot,”
Gihangyo usab niya nga likayan ang iyang gitawag nga “trial by publicity” ug hinuon ipunting ang imbestigasyon sa mga dokumento ug ebidensiya nga mahimong makapamatuod kung adunay nahitabong korapsyon sa mga proyekto.
Sa katapusan, giingon ni Duterte nga trabaho sa mga imbestigador ang pagpangolekta og ebidensiya ug pagtino kung adunay angay manubag sa bisan unsang iregularidad.
