Unom ang patay sa engkwentro tali sa mga operatiba sa kapulisan ug mga armadong grupo sa kalalakihan sa Purok 7, Barangay New Panay sa Aleosan karong adlawa.
Gikumpirma kini sa mga mamahayag ni Aleosan MPS Chief PMaj. Jennefer Amotan. Sa taho sa kapulisan, mag-serve unta og search warrant ang mga kapulisan sa target niini nga si Macabuat Salik nga adunay alyas nga Kwat ug Iskoh sa kasong paglapas sa RA 10591 ug RA 9165 nga aduany kalabutan sa iligal nga paghupot ug armas ug sa iligal nga droga.
Paingon pa lamang ang mga personahe dihang gipabuthan sila sa mga armado nga nagresulta sa engkwentro nga milungtad ug tunga sa oras ang engkwentro, Human sa engkwentro, dinhi nasayran nga lakip sa namatay ang subject sa search warrant nga si Salik kauban ang lima ka mga kaubanan niini. Usa usab sa mga SAF troopers ang namatay sa engkwentro nga giila nga si PCpl. Jed Michael Gregorio.
Samdan usab ang mga kauban niini nga silang PCapt Marc Bryant Tamid-ay, PCapt Kirk John Kollin, PSMS Alcher Dacula, PCpl Mark Joseph Galanta, Pcpl Emonrick Gadat ug Patrolman John Steven Luyun.
Nakumpiska sa operasyon ang usa ka pakete sa gituohan nga shabu samtang nagpadayon usab ang imbestigasyon sa engkwentro sa duha ka grupo.
