GENERAL SANTOS CITY – Gihingusgan ni PO1 Russel Blabagno nga “misunderstanding” lamang ang nahitabo, sa giatubang niining reklamo kalabot sa pagpani-on ug pusil sa gwardiya sa usa ka hotel dinhi sa dakbayan.
Sa pakighinabi sa Bombo Radyo, gihingusgan sa nasampit nga wala siya nani-on ug pusil sa nakalalis nga gwardiya. Giangkon usab ni PO1 Blabagno nga medyo hubog siya kaniadtong tungura.
Apan nakurat na lamang siya karon gumikan nagtuo nga nagkasabtanay na sila gilayon, human sa insidente human nangayo ug pasaylo sa maong gwardiya kaniadtong tungura.
Apan bisan paman, andam matud pa ang naasoy’ng pulis nga atubangon ang reklamo ug ang unsa mang silot nga ipahamtang kaniya.
Kahibaluan nga base sa reklamo, natigayon ang insidente kaniadtong Enero 23, sa Tierra Montana Hotel dinhi sa siyudad, kung asa gawas nga giti-unan niya ug pusil ang gwardiya, gihagit matud pa niya kini nga makigduelo kaniya.
Una nang gipasalig ni OIC PNP City Director S/Supt. Ruel Berango nga paimbestigahan ang maong kaso, ug disiplanahon gayud si PO1 Blabagno nga posibleng makasuhan, depende sa mamahimong resulta sa imbestigasyon.
Kahibaluan nga gidis-armahan na ug kasamtangang anaa sa restricted status si PO1 Blabagno sa Regional Personnel Holding and Accounting Unit (RPHAU) tungod sa reklamo.
