GENERAL SANTOS CITY – Andam si Police Sr. Insp. Riza Santos nga magka-atubangay sila ni Staff Sergeant Francisco Montefalco sa JTF-GenSan aron maklaruhan ang mga butang human ang bangi nilang duha sa checkpoint.
Sa bahin ni Santos, gibutyag sa nasampit nga gusto niya nga magkaistoryahanay silang duha ni Montefalco tungod dili na kinahanglang muabot pa sa punto nga magpasakaanay pa og kaso.
Gikadugang ni Santos nga dili siya gusto og samok hinungdan nga gustong maresolba ang problema. Sa pahayag niini nga gusto niya nga mahitabo nga makorehian kung unsa ang sayop.
Una niini, giangkon ni Santos nga nga may nahimo siyang sayop dihang miagi sa checkpoint.
Apan gihingusgan usab ni Santos nga pareho silang nasayod ni Montefalco sa protocol nga ugaling man ang usa ka tawo ang nasayop ang dili gilayon angayang tutukan ug pusil.
Sa gihimong pagpaklaro ni Santos sa Bombo Radyo, gibutyag niini nga nananghid kang SPO4 Didal nga muagi sa nahisgutang checkpoint hinungdan nga miarangkada na ang gisakyan apan kalit siyang gibabagan ni Ssgt Montefalco ug gitiunan matud pa sa dala niini nga armas.
Samtang, giklaro ni Police Chief Insp. Aldrin Gonzales, tigpamaba sa Police Regional Office 12, nga walay exempted sa mga balaud o unsa mang ordinansa nga ginapatuman sa syudad.
Kalabot kini sa bangi nilang Staff Sergeant Montefalco sa JTF-GenSan og Police Sr. Insp.Santos.
Sumala pa nga ugaling man adunay rason si Santos nganong nagdali hinungdan nga naka-hazard ang gisakyan, apan kinahanglan gihapon niining pasabton ang mga nagpahigayon og checkpoint.
Samtang kalabut sa giingon ni Santos nga mga dokumento nga ipasa, gibutyag ni Gonzales nga bisan Dominggo, aduna gihapoy duty sa PRO-12 aron pagdawat sa mga dokumento nga kinahanglan ipasa gilayon o ” urgent”..
Alang kay Gonzales, ugaling magpasaka ug kaso si Santos batok kay Montefalco, mas maayo pa kini aron masayran kung unsa gayud ang tinuod nga nahitabo sa tabang sa mga testigo nga nakakita sa insidente.
