Nagpagawas og bag-ong direktiba ug pahimangno si Philippine National Police (PNP) Chief PMaj. Gen. Nicolas Torre III alang sa mga pulis nga kaduha mapakyas sa tinuig nga mandatory physical fitness test sa ilang han-ay.
Gibutyag ni Police Regional Office III Director ug PNP Spokesperson PBGen. Jean Fajardo nga prayoridad karon sa bag-ong hepe nga mahimong maayo ug nindot ang resulta sa physical tests sa mga pulis aron makita nga fit-to-work sila, dili lang pinaagi sa mga dokumento.
Dugang niini, kung kaduha dili makapasar ang mga pulis sa maong test, dili na sila mahimong moagi og re-training ug dili na usab sila mahimong i-promote.
Ang katuyoan niining physical tests mao ang pagsiguro nga ang mga pulis mahimong hanas sa pagtuman sa ilang mga mandato, dili lang sa mga operasyon apan lakip usab sa uban pang mga kalihokan sa kapulisan.
Samtang, gikonsidera na usab sa bag-ong liderato sa PNP ang panglawas sa mga pulis nga angay lang sumala sa ilang edad, gitas-on, ug gibug-aton.
