GENERAL SANTOS CITY – Disiplinahon ug pasakaan ug kasong administratibo ang pulis nga nagpakita ug dili maayong batasan ug namalikas pa sa checkpoint.
Kini ang gipasalig ni OIC City PNP director Ruel Berango sa pakighinabi sa Bombo Radyo, may kalabutan kang PO3 Norberto Ferolino nga nagpakita ug pagka-arogante sa checkpoint sa City Public Safety Company.
Matud ni Berango, dakong kasupakan isip tigpatuman sa balaod ang gihimo ni Ferolino nga nagmaneho nga hubog, pagdala-dala ug armas bisan ug dili on-duty, ug pagpakita ug dili maayong batasan sa mga sakop sa CPSC.
Hinungdan nga kinahanglan matud pang manubag ang naasoy’ng pasaway nga pulis.
Kahinumduman nga gilayong gidis-armahan sa taga-CPSC si PO3 Ferolino, human namalikas ug gipakita ang iyang service pistol, dihang gipangitaan ug mga dokumento sa gimanehuan nga motorsiklo atul sa checkpoint miaging gabii sa P. Acharon Boulevard.
Ug gani, gibutyag ni Berango nga mas maayo unta kon gilayong giaresto ug gibalhug sa taga-CPSC si PO3 Ferolino human sa insidente.
Samtang, gimando na matud pa ni P/S/Supt. Berango nga ibutang ang naasoy’ng pulis sa admin holding office sa Camp Fermin G. Lira, gumikan sa nahimong kabulastugan.
